मुलांना वाचनाची आवड नसल्याचं सतत सांगितलं जातं. मात्र त्यांना आवडेल, रुचेल असं साहित्य दिलं तर ते नक्कीच त्यांच्या पसंतीस पडतं. हे लक्षात घेऊन, दररोज एक बालकथा हा डिजिटल उपक्रम सुरु केला. त्याअंतर्गत वेगवेगळ्या कथा देत गेलो. या कथांमध्ये साहस कथा, परी कथा, रहस्य कथा, प्रेरणा देणाऱ्या कथा, करिअर कथा, गंमत कथा, प्राणी कथा, पक्षी कथा, नव्या इसाप कथा अशा सर्व प्रकारातील कथा आहेत. मुलांसोबतच थोरांनांही आवडतील अशा या कथा आहेत. गोष्ट सांगता सांगता एखादा छोटासा उपदेश, मार्गदर्शन केलं जातं.  रंजन हे मुख्य ध्येय्य, त्यातून मुलांना प्रेरणा मिळावी, एखादा चांगला गुण आत्मसात करता यावा, त्यांचा आत्मविश्वास वाढवा, चांगले नागरिक होण्यासाठी आवश्यक अशा कर्तव्य आणि जबाबदारीची जाणीव व्हावी, अशी माफक अपेक्षा आहे. ही अपेक्षा या कथा पूर्ण करत असल्याचे मिळालेल्या उदंड प्रतिसादावरुन दिसून येतं. दररोज एक बालकथा,हा डिजिटल उपक्रम मराठीत तरी एकमेव आहे.

10वी, 12वी आणि पदवी नंतर पुढे काय करायचं? हा प्रश्न प्रत्येक पालक आणि विद्यार्थ्यांना कायम पडत असतो. करिअरचे विविध आणि असंख्य पर्याय उपलबध झाले आहेत. पण त्यांची नेमकी माहिती, नेमक्या वेळेला पालक आणि विद्यार्थ्यांना मिळत नाही. त्यामुळे मग अनेक संधी हुकत असतात. शाळा आणि महाविद्यालयांमध्ये शिक्षक आणि अध्यापक योग्य त्या करिअर पर्यायांची माहिती विद्यार्थ्यांना देत नाहीत. त्यांनाही नव्या करिअर संधी आणि अभ्यासक्रमांची माहिती असत नाही. या सर्व अडचणी लक्षात घेऊन करिअर कंसेप्ट, हा डिजिटल प्लॅटफॉर्म सुरु केला आहे. यावर 10वी, 12वी, पदवी आणि पदव्युत्तर पदवी अभ्यासक्रमांची विस्तृत माहिती, प्रवेश प्रक्रिया, चाळणी परीक्षा, रोजगार आणि स्वयंरोजगार संधी, शिष्यवृत्ती याविषयी मार्गदर्शन केलं जातं. या माहितीच्या आधारे पालक-शिक्षक-समूपदेशक-विद्यार्थ्यांना करिअर संदर्भातील स्पष्ट दृष्टीकोन मिळून त्यांची दिशा स्वयंस्पष्ट होऊ शकते.